Reports | KTZ

Thanlon Division Dorka Khawmpi 38na Report

Thanlon Division Dorka Khawmpi 38na February 16-18, 2018 sung EBCC Thanlon Biakin a kizang khawmpi Report tangpi i taklang ding:

Thugenna hunte: Khawmpi thupi “Nang vualzawlna hi in (Gen 12:2)” chih thupi pansan in Miss Liankhoman, Dorcas Co- ordinator leh Rev L Khaikhansong, DS TL/D ten thugenna hun zang ua, Pastor T Khupkhansiam leh Pastor P Hau Shoute ten Devotion hon makaih uhi. Nu Thangngai in seminar hun nih zang a nek leh dawn toh kisai sinsakna poimoh leh manphatak hon neihpih hi. Heutunu Dimzangai, President Central Dorcas Sub Committee in Nipini zing kikhopna ah DORCED thu leh poimoh a sak dangdangte ban ah khawmpi thupi toh kisai saulou sharing nei hi. Khawmpi paikhawmten thugente leh kisinsaknate nuamsa in manpha kisa mahmah hi.

Division sung toh kisai: Thanlon Division sung a Dorka Pawlte khawmpi paikhawm mikhual 144 hi (Pastor 5, Upa Ordained 3 leh khotualte simlouh in). Division sung ah Dorka Milip 1493 om a, huai lak ah Sawmakhat (1/10) pe gige mi 649 om hi. Inn 559 om a inn 543 in Antangpham pham ua, a phamlou inn 16 om hi.

Antang pham mimal phaam dan in: Nu Thangzavung, N E Tangnuam in kumkhat in kg 482 antangpam pham a; Nu T. Chingngaihkim, Bukpi in kg 469 pham khia a; Nu Singthuam, N E Tangnuam in kg 450 pham khia hi.

Bible Quiz Kidemna ah - Kidemna Bible Quiz siam thei mahmah ua, Thanlon Dorka pawl in khatna la a, Phaitong leh N E Tangnuam kikim ua laidoh thoh in Phaitong Dorka Pawl in 2nd la in NE Tangnuam in 3rd na la uhi.

Lapawlpi a Ist - Lapawlpi kidemna ah EBCC Phaitong in 1st la a, EBCC Thanlon in 2nd la in EBCC Dialkhai in 3rd la uhi.

Bible Chang kidemna - Bible Chang kidemna ah 1na EBCC Thanlon in la a; 2na EBCC Bukpi in la in a; 3na EBCC Khajang in la uhi.

Pathianni sunnung hun in Heutunu Liankhoman, Dorcas Co- ordinator in December 28, 2018 a hon Pension santa ding ahihziak a Pathian min a amah Pahtawina leh khakna program kizang a Pakkhi leh Thailand Bed sheet khat kipia in Thanlon DS in amah adia thumsakna manphatak nei hi.

Sum bituk toh kisai: Thanlon Division Dorka Pawl in Antangpham a bituk Rs. 4,40,000/- lak ah Rs. 3,80,118/- pekhinta ua, a samlai Rs. 59,882/- March 2018 tan a piak zoh sawm uhi. Thanlon Division Dorka Pawlte tamlou leh sum haksatna mun himahleh Pathian panpihna toh theihtawpsuah a pan hon lakna tung uah kipahpihhuai mahmah uhi. Pathian in Thanlon Division Dorka Pawlte phungvuh zel hen aw. Thupina leh pahtawina teng Pathian in tangta hen.

Sd/-
Rev L Khaikhansong, DS/ Thanlon Division

© 2018 Evangelical Baptist Convention. All Rights Reserved. Designed By EBC