Reports | KTZ

Dorka Khawmpilian 41-na report

Dorka Khawmpilian 41-na report simtute i Toupa Jesu Khrist min in chibai aw! Tutung Khawmpi report tangpi anuai ah kon taklang hi:

EBC in Dorka Khawmpilian kum thum hal a kinei zel, a 41veina September 7-10, 2017 sung EBC Gospel Centenary Hall, New Lamka ah “Na omdan uh Khrist Tanchin hoih toh kituak sak photphot un” (Philippi 1:27) chih thupi a nei in kizang hi. September 7, 2017 nitak in Director of Ministries Rev. Paukhanmang Guite in khawmpi honna nei a tuazoh in Drama team ten thupi toh kituak drama lungkhoih leh nuam mahmah hon lak uhi.

1. Thugentu leh Sinsaktute: September 9 nitak leh September 10 Nipini zing leh nitak in heutupa Rev S Vung Minthang, G/S in khawmpi thupi pansan in thugenna hun zang a, Sept. 8 -10 zingsang teng in Rev Kumam Suresh Singh in Philippi laibu nouneltak in hon sinpih hi. Seminar hun a sinsaktu dia seh a omte: Dr Niangsangching, Mrs. Lily Tombing, Mrs. Vungkhawlching, Mrs Lalhlimpuii, Miss Muani Tombing leh Ms Manzavung Thomte ten amau Subject chiat zouthohtak leh nuamtak in hon sinsak uhi. Hun zangtute tengteng hun zat a nuam lou himhim omlou a a ngaikheten nuam leh manpha kisa thei mahmah hi.

2. Biakna lehPhatna Lapawl: EBC Central Choir leh Pastor ziten Biakna leh phatna hon makaih ua mipi’n Pathian phatna Lasak nuamtak in kinei zel hi. Phatna Lapawl toh kisai in Division sagih, Mission Field thum, Khopi saptuam giat apan paikhawmte ban ah deihtuam a chial tuam unau CBWA leh PWF PCI (R) numei pawlte, Pastor zite leh Pearsonte apan phatna La siamtaktak in hong sa ua nuam mahmah hi. Khawmpi sung
in Phatna Lapawl 21 kisa khia hi. Hiai phatna lasate kiang ah thilpiak kipe chiat a Divisionte kiang ah Dan belpi kipia a Mission Field leh khopite kiang ah belsun kipia hi. Deihtuam a chial CBWA leh PWF PCI (R) numei pawlte kiang ah Dan belpi leh Memento kipia hi.

3. Khawmpi a Thilpiak Piakte:
Khawmpi Bag: Dorka Khawmpi lian 41-na theih gigena (Souvenir) ding in Numei bag leh Pasal bag kibawl hi. Tuate GS, Directors, DS, FS, Missionary-te, Dorka makai masa hon dampih lai leh Dorkate sawltak masa hon dampih laite leh mi tuamtuam tamkhop kiang ah khawmpi bag souvenir in kihawm khia hi.

4. Special GreetingsPete: Special Greetings pedia chial a om Mrs Lalduhawmi Secretary ABWU leh Miss Lhingboi MBC Women Secretary i chialna uh hong hih buchinsak ziak ua kipahthu genna in Memento leh Blanket kipia hi.

5. DorcasAward Kipia: Tutung Khawmpi ah anuai a mi 5te kiang ah Dorcas Award in Memento leh Blanket kipia hi.

Pa Thangdam & Pa Khamkhochin – amau gel in a zite uh taksa leh lungsim a kep ngai gige om himahle uh ittak leh deihthohtak a a kepdan uh thupi leh zahtaktham sa in Dorka Pawl in Memento leh blanket i pia hi.

Pa V Jamzagin - DORCED i pattung 2013 kum apan tunitan in DORCED Project a i chawm Melody Timungpi Karbi Field apan a na ompih ziak a kipahthu genna in i kipia hi.

Pa T Pumkhothang – in hun paisa leh tutung Dorka Pawl thupi toh kituak Pathian phatna La hon bawlsak ziak leh i nam pumpi adia a contribution thupi mahmah kipahpihna in Memento leh Blanket kipia hi.

Miss Liankhoman – Heutunu Liankhoman, Dorcas Co-ordinator in kum 1991 apan tuni tan hon na makaih ziak leh DORCED i pattung 2013 kum apan tunitan DORCED Project nuai a chawm naupang Benzamin Rongpi, Karbi Anglong Field apan a na ompih ziak a kipahthu genna in Memento leh Blanket kipia hi.

6. DorcasJoint Meeting 19na: September 8, 2017, sunnung in CDSC leh Adviser makaih in Division Comt, Mission Field Committee, Khopi Saptuam leh TBDFC ten Joint Meeting kinei a hiai hun ah member 606 kipaikhawm hi.

7. Hotdamna Sang 11 om: Tutung khawmpi ah khalam buaina neite ading in Counseling om gige a, mi 11 in hotdamna sang thei uhi.

8. Khawmpi Khakna: September 10, nitak in Khawmpi nuamtak a zat zoh ahih in Rev V Thangkhangin, Director of Missions in khawmpi khakna nei in khawmpi zoh ahi. Khawmpina ah biakna kikhop hunte ah mipi Centenary Hall ah kitazou ngeilou hi.

KIPAHTHU GENNA TAMLOU:
Amasa in Pathian in khawmpi ding kisak kholh tung apan a a zohni tan a buaina omlou a hon pi ziak in kipahthu i gen masa hi. Huan singtang gam leh phaizang gam apan a khawmpi palai hong paikhawmte damtak a hon pitung a amau inlum chiat a pitun nawn ziak in Pathian tung ah kipahthu i gen hi.

Anihna ah: Khawmpi neih ding hon phalsak a, sum leh pai zat ding hon pia, vanzat poimoh teng hon zangsak a khawmpi hoihtak a hong uap Dorcas hall heutute, DSte, FSte, Pastorte Upate leh mipi tengteng tung ah kipahthu i gen hi. Lampi haksatak lak a hong pai Singtang gam mun tuamtuam apante, Khopi mun tuamtuam apan leh Mission Field-te akipan a hong paikhawm mipite leh mikhual zintuntu Saptuam tuamtuamte tung ah kipahthu i gen hi.

Athumna ah: Khawmpina ding toh kisai a apoimohte hon saisak Physical arrangement, Decorations biakna leh phatna pitute, usher na hon sepsaktute, khawmpina a hunzatnate avek a Video a thawn liauliau a hon laksak Tullou TV neitu leh a staff te, Local Newspaper a hon na suahsak leh puan saktute teng leh thumsaktute tengteng tung ah kipahthu KTZ tungtawn in i gen hi. Dorka Khawmpi Report tungtawn in Pathian in thupina tangta hen. Kipak e.

-Report petu, Miss Liankhoman, Secretary CDSC

© 2017 Evangelical Baptist Convention. All Rights Reserved. Designed By EBC