May 2018

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Mission field-te tungtawn a Toupa’n thil thupi hon muhsak, anuai a bang in enkhawm nawn ni.

A. NEPAL MISSION FIELD:
1. SUNDAY SCHOOL TEACHERS MEET
Nepal Field a phaizang a om saptuamte ading in Baal Sangati [Baptist Children Department] heutute kithuahkhawmna Budhabare NEBC Biakin ah March 22 in kinei hi. Hiai hun ah kum 2018 sung a Baal Sangati makai ding telkhiakna om a F/S in amaute hasotna thu gen hi. May 25 in Shantinagar NEBCC ah kithuahkhawmna om nawn ding hi. Singtang lam a Pastor Area 2 gawm in Baal Sangati meet March 28 in Songretar ah nei uhi. Naupangte khalam etkolna a panlakna thumna toh panpih zel ni.

2. SIKKIM GROUP EVANGELISM REPORTS
March 20-25 sung Sikkim Group Evangelism program kizang hi. Hiai hun in semtute 6 kihelthei ua, sun chiang in inn a banlut in tanchin hoih genna leh tract hawmna nei zel uhi. Nitak chiang in projector zang in film show bawl zel in Pathian thutak gen zel uhi. Hiai hun ah mi 30-40 vel paikhawm gige uhi. Sikkim Group evangelism tungtawn in gingthak mi 6 Toupan hon pia a, amaute Takhuthang fellowship ah kikhawm zel uhi. Sikkim group evangelism sponsortu LS/ Divisionte tung ah kipahthu i gen in Pathian min i phat ahi.
Maban ah Career Guidance tungtawn a Pathian thugenna leh studentte panpihna program khat field in bawl sawmlai hi. Hiai hun in student exam dite leh college kai dingte maban genpih na leh amaute deihsakna thu houlimpih ding chih tup in nei uhi. Thumna in phawk ni.

3. PROJECT SEP A OM LELTE:
• Khedok Biakin: Khedok saptuam 1993 a na kipanta, a biakin aluitak ban ah agam toh kisai afellou a om ziak in, local saptuam in munthak 2017 in na leikhia ua, tu’n biakin kilam lellel hi.
• Ektin Biakin: Ektin Saptuam 2011 kum in kipan a, tunitan biakin neilou in mi inn ah kikhawm uhi. I gingtute khat in ama gam Ruponi 1 Biakin lamna ding in thoh hi. Asum a tuat in NC in 10,00,000.00 khawng man hi. Ground levelling zouta ua, biakin lam patpah theih ding hita thumpih ni.
• Basbari Biakin: Basbari Saptuam 2008 kum a dingkhia hi a, member pung lawmlawm kei mahleh Pathian pina toh semtute tungtawn a masawn zel ding a lamet ahi. Biakin lampah ahihtheihna ding in thum ni.
• Angkhop Staff Quarter: Hiai quarter, nasepna local saptuam makaih a Local Saptuamte leh Field pangkhawm a bawl hi a, zohpah lam-et ahi.
• Gopetar Baal Sangati Building: Hiai building Pastor quarter nuai a kilam hi a a baang leh tuang zoh hita, kongkhak leh tawlette’n samlai. Amau Saptuam in ana pat uh, Gaonpalika te huhna tamlou toh zou thei ding uhi. Hiaitan dong Toupan honpi kipahthu gen in, hon zohsiang pahtheih nading un thum ni.

4. KIPAHTHU GENNA LEH THUMNA DING TE:
1. March 2018 khasung a Gingthak mi 19 leh Baptisma tang mi 14 hon piakte ziak in Pathian kiang kipahthu gen ni. Khalam a a khanlet zeltheihna ding un thumpih zel ni.
2. Nepal Field a sem ding Pastor leh Missionary 1 tuak Field mun a DPC tungtawn in recommend kibawl hi. Pastor ding in Evangelist Prem Raj Rai Bantawa leh Missionary ding in Evangelist Diwas Raite tel hi uhi. Amau ziak a kipahthu gen in, semtu manpha leh gahsuah hong hihtheihna ding un thumpih ni.
3. Haldibari biakin bawlna ding a sponsortu LN/ Divisionte ziak in kipahthu gen ni. Biakin adung feet 35 leh avai feet 20 alian Mr. Khamson leh a lawmte’n tha-it tak in bawl lel ua thumna in phawk ni.
4. Hwaku ah biakin poimoh ua neihzohpah ahihtheihna ding in thum ni.
5. Sikkim Station thak Jorethang ah missionary 2, Evan. Thonkhanlian leh a zi Evan. Chingkhongai te inkuan April 8 in Nongtham akipan in tungta uhi. Munthak a gahsuahtak a, a septheihna ding un thumpih ni.
6. Itahari station a semlel Evan. Miss Sangbiakmawi, May 5, 2018 in Mr. Thangkhenmung Guite (s/o Pastor G Khankham) toh Shillong ah kiteeng ding uh. Kipahthu gen in buaina omlou a kitenna program zat ahihtheihna di’n thum ni.
7. March kha sung in i Field sung Chisang a omte i Saptuam member mi 3 Mr. Raju Chaudhuri, kum 29, Damak; Mrs. Ashmaya Rai, kum 85, Padajungi leh Mrs. Indramaya Rai, kum 61 ten a tangtawn mun ding hon na zot san uhi, a nutsiat a innkuanpihte uh thumpih ni.

B. KARBI ANGLONG MISSION FIELD:
1. THU TUAMTUAM:
1. Gingtu kibehlap: Pathian in i thumna hon dawng in Field a semtute sepna tungtawn in March 25 in Paklongkam ah Karbi Honghari Sahkhua a kipan innkuan khat Jesu Khrist nungzui ding in kipia ua, amaute hun lemtang masapen a tuiphumna piak dia mansa in omta uhi.
2. Thil lamdang: Dengaon a, Mr Sonuram Tisso Khua Hausapa Karbi Sakhua (Honghari) siampu, January in Khristian in kipia hi. Amah zunlam toh kisai buaina neigige ahih ziak in a kipiak nung kha nih chingta in a omna saptuamten anngawl a thumna neihpih ua March 25 in suang lianpi a zun ah thakhia hi. Pathian kiang kipahthu gen in, a testimony tungtawn a midangte’n Pathian a muhtheihna ding un thum ni.
3. Field BDF Committee Camp:
Khalam pianthakna mahmah poimoh pen chi’n field sung a local BDF member te’n Hotdamna Camp (Peniel Camp II) March 22 - 25 sung, New Langrik ah nei uhi. Field Superintendent in camp honna nei a, Evan. JK Teron leh Evan. Jacob Rongpite’n thu gen uhi. Camperte’n Pathian kha polhna tangin thugen tungtawn in Piangthak dan a na kikoih a piangthaklou ahihlam kimukhia leh kitheihchetthakna nei mi 21vel om hi. Pianthakna thu himhim theikha nailou mi 20 Pathian in a hon piak ban ah Piangthaksa, kipiakthakna nei mi 13 om a lohching mahmah hi.

4. Farewell Program: Evangelist Kania Hanse, Pathian ompihna toh chidamtak a KEBC sung a Pathian gamna a sepna March 1 a retirement mu a a om thupi leh etton tham ahihdan field in phawkpihna leh kipahpihna in Farewell Program hoihtak Workers fellowship hun in kineihpih hi. Hiai hun ah F/S in Farewell Speech gen a, Memento piakna leh Puandum silhsakna Field pumpi leh Field sung a semtute sik-le-tang in nei hi. Hiai hun in Asst. FS in Evan. Kania leh a Innkuante adia Pathian vualzawlna ngen a thumsakna nei hi.

5. Sawltak 3 ten Field Exposure nei: March 05-29, sung Pastor Candidate Mr. Khenthang Buansing, Mr. G. Pauzarual leh Mr. N. Khualmang te’n Karbi Anglong Mission Field ah Exposure nei uhi. Field Superintendent in amaute Tour Tentative program hoihtak bawlsak a, khua leh schoolte vehna leh mun khenkhat ah chialpina leng zang uhi. Amaute kalsuanna field in thu leh la ah hamphatna tampitak tang uh ahihdan report muh ahi.

6. Finance Awareness Programme: EBC Head Quarter a sumlam saite Upa T. Ginzalian leh heutupa Singnunsiam te makaih in Dimapur ah Karbi Anglong Mission Field leh Dhemaji Mission Field gawm in Finance Awareness Programme neih in om hi. Hiai hun ah Khotuamtuam a Saptuam makai hunkhop paikhawm a, hiai bang sinsakna a tam theilam neih hithei leh phatuam mahmah ding a lamet ahi.

7. Khualzin Khia uh: EBCC Mumbai Saptuam din kum thumna hun zang ding in March 14-18 sung Field Superintendent zinkhia a, huai hun sung mah in Office Accountant leng Dhemaji Mission Field Office ah FS/Dhemaji chialna bang in Accounting toh kisai sinsak ding in zin hi. Hih theihna chiang chiang a manpha tak a kizang theih a a om uh kipahpih huai mahmah hi.

C. DHEMAJI MISSION FIELD:
1. THU TUAMTUAM.
i) March 6-7 sung, EBCC Dimapur ah Finance Awareness Program neih in om a, FS leh Evan. V Ginsonthang, Accountant te vakihel uhi.
ii) Evan. Gounemlian in Community Leaders Health Training Certificate, Dimapur ah Phase-I lohching tak in zou thei hi.
iii) March 15 in Native workers teng in “One Day Seminar” lohching tak in zangkhawm ua, FS in “The Art of Goal Setting and Planning” chih leh, “Homiletics” sinsakna nei a nuamsa leh lohchingtak in zou uhi.
iv) March 17 in Evan. Haukhosiam Guite sepna ah saptuam 3; Lachangaon, Dokhinchapori leh Bandena te’n Workshop-cum- Discussion on “Worship Service” chih hun zangkhawm ua, Pathian kha polhna toh nuamsa mahmah uhi.

2. Ministries Report:
i) Mission Field lohchinna i tehna Baptisma tang ahih kawmkawm in, Baptisma tangsa gingtute keptuak mahmah uhi. Dhemaji Field ah gingtu kepna uangbawl a sinsakna leh training a tamthei lam neihpih ding tup ahihman in thumna in phawkzel ni.
ii) March 25, Palm Sunday in Field saptuam te’n program lohchingtak in zang chiat ua, mun khenkhat ah Tumnah tawi a kholai fanna nei uhi. Hiaibang program manphatak zattheih a om gingthakte ading in lamlahna poimoh tak ahih man in manpha mahmah hi.
iii) Pastor Thangbiakmang sepna a Mr. Saplai Pegu bangzah vei hiam counseling neihpih ahih nung in biakin kaitheita a Baptisma tangding a kimanta ahihmanin hunlem masa ah tansak in om ding hi.
iv) Evan. Khankhualte sepna Pityangchapori ah Mr Bimala Pegute innkuan counseling neihpih zel in om a, amauleng lunglut ua NT Bible kipia hi, a innsung ua milim pathiante hepkhiak hitamahleh Baptisma a tanding uh a sanggamte’n dallai uh. Pathian in a sanggamte lungsim a kheksakna di’n thumpih zel ni.
v) Evan. Biaksuan sepna Dunaguri ah Mr Mahindra Pegu, Kiran Doley leh Durbo Jypti te’n kikhop ngaihsaklou in a lawmluite uh vapawl khanak uhi. Amaute zu leh sa hihsa ahih banuah, siamsinna lam neikhalou ahihman un semtu te’n thuhilh haksa asak hun uh om hi. Sinsakna kipete zang a Pathian in a lungsim uh akhek theihna ding un thumpih zel ni.
vi) Mr Indesor Mili, Maj Gaon a om nungtolh ziak a bangtan hiam kikhawm lou a om, Saptuamte vehna tungtawn in kikhawm nawnta Khalam a hong hatsem nadi’n thumpih ni.
vii) April 6-8 sung, Rev. S Gin Malsawm. DSD leh Pastor Khaikhuphang te’n Dhemaji Field vehna nei ua, Director in Center-3 ah seminar neihpih hi. Pathian ompihna toh Program lohchingtak in kizou kipahthu gen ni.
viii) EBCC Itanagar biakin phelkhiak ahihnung Biakna ding mun kichian omlou himahleh Naga Christian Fellowship (NCF) Naharlagunte biakin zat ding phalsak in ki-om a Biakna lamzang tak a sutzop ahihtheihna ding leh Itanagar saptuam apun zel theihna ding un thum ni.

D. MANIPUR MISSION FIELD:
1. THU TUAMTUAM:
1. Maitram a field office mun ding a fencing bawl pat ahih pah theih nadi’n field in panla lel hi.
2. MEBC Tuailaite amau kitoudelh in March 2 - 6 sung Field Youth Gospel Camp Thamnapokpi ah nei ua, Evan. T Damkhothang in thu gen a lohching tak in zou uhi. Tuailai 136 in minkhumlut ua, amaute akimkhat phial ginglou mi hi ua, mi 30val in Jesu Hondampa in sang ua, mi 50 – 60 kikal ten kipiak thakna nei uhi. TOUPAN thupina tangta hen.
3. Field BDF in a hihdan ngeina bang un khateng second Saturday teng in pastor area te ah anngawl thumna nei khawm thei zel uhi. DORCED project leng ahithei tan a panpih ding sawm in pan lazel uhi.
4. IES Thiyam paihoih zel in amau in kitoudelh thei nawnta ua Student 223 in first term exam thei uhi, thumna in phawkzel ni.

2. KIPAHTHU GENNA LEH THUMNA DINGTE:
1. Toupan khamangthang -21, sawm-a-khat pethak -2, missionary vakna pethak -1 honpiakte ziak in kipahthu gen ni. Toupan semtute tungtawn a gingthak leh thilpiak petu tamsem hon piakbeh a field a saptuamte a hong kitoudelh theihna ding un thumpih zel ni.
2. Field a semtu mun-awng hukna ding Missionary 2 P. Anand, M.Th leh Ch. Jano, BD te hon pia a kipahthu gen in itna leh veina nei kawm a khamangthang mantu a hong hihtheihna ding un thumsak ni.
3. Miss Sophia, Pallel college kai a om Kwakeithel fellowship a tel in Jesu a hondampa di’n sang hi. A nunawn in biakin kai ding a phallouh ban ah, housia in, engbawl nak thei mahmah hi. Pathian panpihna toh ginna kiptak nei a khalam a hong khanzel theihna ding in thumna ah phawk ni.
4. Gingtu mitdel Prakash tunitan biakin kai leh gingtute toh kithuzak kham bikbek lai ahi. Amah ginom mahmah in MMV din khateng in Rs. 100/- pezou gige lai hi. Thumna ah khalam nungtawlh louhna din thumsak ni.
5. Jiribam a MEBC a gingtu khat Ranita, mitdel a tapa nihte toh a pasal in taisan a, a tapate DORCED Project in chawm hi. Amaute adin thum sak zel ni.
6. Jiribam a gingtu Robindro inn ding bawlsak a om zoh phial hita. A biik in Imphal Division, Field leh Jiribam a om EBC saptuamte deihsakna thupi mahmah hi. Pathian kiang ah kipahthu gen in, Khalam leh salam a hong hat zel theihna ding un thumsak ni.
7. Field taksap Roman script a kisun Bible ahi. FBYF panlakna Tuailaite simtheih ding Bible Pathian panpihna a a neihbaih theihna ding un thumsak ni.
8. Semtute lak a tangval N. Hemanta leh Ch Shitaljit ten tukum a zi neihsawm uhi. Pathian in a nasepna uh panpih thei ding nungak ginom, Toupa lau mi a piakna ding in thumsak ni.
9. Ramesh, IES skul a sem Activa phutkhak a accident a hong damsiang pah theihna di’n thumsak ni. N. Ayingthoibi, Thanga a Dorcas makai BP sang leh zunkhum nei a hong damsiang theihna ding in thumpih ni.

© 2018 Evangelical Baptist Convention. All Rights Reserved. Designed By EBC