Missionary Day

Ka ngaihtuahte na ngaihtuahte ahi keia, na omdante leng ka omdan ahi sam kei, Toupa’n a chi (Is 55:8).

Tukha in Missionary Day, Nute’ Ni leh Pentecost Day nipoimohte zangdia i kisak lai in Toupa’n hiai nite tungtawn a midangte ading a vualzawlna hiding in deihsakna thu kon khak hi. Bible in vualzawlna a chihte leh tuni a eiten vualzawlna i chihte a kibang ahi hia ahih keileh a kibanglou? chihte tutung in ngaihtuah khawm leng i chi hi. Johan, Patmos tuikulh a suangkulh a tan lai in vualzawlna tang ahi diam? Stephan thugen in mipite hehsak a suang a aden lai un vualzawlna tang ahi diam? Joseph, guamsung khawng, suangkulh sung khawng a koih ahih lai in vualzawlna tang ahi diam? Kumpipa Solomon hauhsakna kim neipa vualzawlna tang hi-a, tuikhuk buannawi lak a a khiakpa uh Jeremia vualzawlna tanglou ahi diam (Jer 38)? Luke 16 a mihausapa vualzawlna tang hi-a Lazar pen hamsia tang i chi thei diam? Tulai hun a vualzawlna i chihte leh hamsia i chihte Pathian chihdan ahi mah de aw. Fencing sangtak ki-umkhum a marble tuang tung a teng a motor nih leh thum toh niteng nek ding buai nawnloute vualzawlna tang hi ua, mi inn luah a niteng nek ding zong tawm te, tate laisimsak zouloute vualzawlna tanglou himahlou ding maw?

I vualzawlna gen uh leitung thil a hauhsakna hileltak hia? Amasa pen in, hiai theihsiamna ding in khalam pianthakna diktak a poimoh hi. Anihna ah, Bible toh kituak khovel etdan (Biblical world view) neih a poimoh hi. Athumna, ah khovel mite thil etdan (secular world view) a diklouh dan theih leng a poimoh hi. Hiai etdan chi nihte kikal ah tulai khristiante hamhaihna thupitak in a hon tuam hi. Diktatna, ginomna thute gen gen mah lehang i thil muhdan leh etdan uh Bible etdan toh a kituahlouh ziak in i Khristian hihna un gen a nei thei kei hi. Taksapna leh gentheihna himhim hamsia dan-a pomna hattak a om hi. Thum mi hiinla, khami tak himah lechin na khosakna aniam sim leh na kiang a gingtuten hon ngaisanglou kia hilou in na Pathian thu awidan a diklou om hi ding chih bawl in hon gal-et zomah kha ding uhi. Huchi mah bang in nang leng na thil etdan (world view) a dik kei leh na kingaise zomah ding hi. Tulai Khristianna tuh Khamitna Khristianna hi nawnlou in thilneih lunggulhna (materialistic Christianity) ahita hi.

Tulai khantouhna toh kiton a Pathian etdan hiam Bible etdan sang a leitung etdan chimai ni (secular- economic, technological, ethical, worldview) te’n ahon thazoh luat ziak in gengen in sasa leng zong adik theilou khat om hi. Etsakna: Zu leh khamtheih zuak i deihkei ua, chingpi kap, galvan zuak, chihte hoih i sakei uhi. Himahleh, hiai thil hoihloute zuak a mikhat a hong hauhsak chiang in i society leh Biakin sung nasan ah i ngaihsangte ahi zel uhi. Bangziak hiding hiam i chih leh mihing manphatna mihing hinna a suilou in a neih alam apan i et ziak uh ahi. I problem lian pen tuh i manphat dan (i identity) toh neih-le-lam i mekmat luat uh ahi. Mizawng na hihleh na manpha khol kei dia, na thugen leng a kila khol kei dia, na hong hauhsak zenzen lebel a pilpa na hongsuak ding hi. Hiai, khovel thil etdan ahi, Kha Siangthou neiten leng hichidan a et dimah ahi diam?

Tulai i Khristianna uh hichi khawng ana hi maimah hi. Khovel khangtou zel ah i om a hauhna, pilna leng a khan ding mah ahi. Himahleh, Jesu a i hihna, i identity sang a thupizaw omlou ahi. Pilna siamna ah leng i khantouh zel ding mah ahi. Himahleh, tua i tunna tan bel mahni kipilsak, midang tokheng muhsak thei, heutu leh makaite chinlahna muban, ataktak a kibangvek hingal dinmun ah i om hi. Tua sang a i masawn zawk deuh chiang in kitunding tuah dan i siam ta ding hi. Tulaitak bel kuamah kithusim omlou mahni omna mun ah philosopher pian deuh ngen i bang uhi. Bible in tuh “Kikhenna ding leh kithupisakna ziak in bangmah hihkei un; lungsim niamlak in michih in amah sang in midang hoih sazaw hen” (Phil 2:3) a chi hi. I khamitdante uh kivelthak a poimoh hi. Inkuante vei kichite lah a sungkuante mohsatu suak; hinna a muh di om tuanlou. Saptuam vei kichite lah saptuam mohsa, halhna deihten lah kei kong halh masa di chilou, midang ngoh zel. Tangthu khat ka simkhakna ah England a chialpi bawlna khat ah Pathian a omkei chipa (Atheist) khat kikhawm din akuan a lampi ah miten “E! na melmapa thugen va ngaidek maw ana chih uleh… a dik ahi, ka pomdan uah kimelma ka hi uh himahleh a hinkhua in kei hon zou ahi” chiin a dawng a chi uhi. Midangte adia vualzawlna hihna ding in zaw mihing lui guhtuah meklawi akul a, tuaban ah Jakob (luhsuahtu) apan min thak Israel a kikhek a ngai hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC