Articles | KTZ | EBC

Nang Vualzawlna Hi In (Gen 12:2)

Diktatna a kilamtouhna i neih khit a “Nang vualzawlna hi in” chih thupi hoih leh manpha gelh thei dia hun piak a ka om ziak in Pathian min phat in kipahthu ka gen masa hi. Nang vualzawlna hi in chih thuvual hausa tak etdan tuamtuam bangzah hiam a kigelhta a, tu`n leng etdan tuamdeuh khat in i en ding uh.

Thupi lakkhiakna a vual- zawlna Hebru ah “barakh” a hi a, nasep genna ahi. A semtu pen Pathian /mihing a hithei a, a dongtu leng Pathian/mihing a hithei hi. I thupi kilepdan leh laigelhdan (Grammar) et in, “Nang” (You- second person) ahihziak in thil bangkim ah Vualzawlna kipatna Pathian a masa a koih gige, eite a nihna pang in “nang vualzawlna hi in” chih sepsuahtheihna omlel ding hi.

Thukhun Lui a “barakhah” (Heb) leh Thukhun Thak a “aeulogia” (Grk) pen thilhoih gahkhia leh kilangkhia genna ahi a, Thukhun Lui a “barukh” (Heb) leh Thukhun Thak a ‘makarios’ (Grk) in hampha, nuamsa gen in, “barakh” in zahna pia a khukdin chih gen hi. Nidang lai in vualzawlna a kipiak dek chiang ua, Pheipi nuai a kun a khut a koihdan uh genna ahi (Gen. 24:2). Huaiziak in vualzawlna omdan tak “Manpha, zahtakhuai leh ngaihthupi a omna” ahihman in muhtheih thilte kia gen hilou in mihing sunglam hoihna leng a huam hi.

Thukhun Lui ah vualzawlna zatdan chi nih a om. Khatna, Vualzawlna puankhiakna ahi a; a nihna, vualzawlna ngetsakna ahi. A masa pen Pathian in mihing masa a vualzawlna ahi (Gen. 1:28). Hibang vualzawlna pen thupiak/thugen ngeina bang in zat in om hi (Gen. 26:60; 27:29; I Sam. 25:33).

Mihingte in vualzawlna hi a i koih lohchinna i muhte, damtheihna leh hauhsakna te ahi; himahleh, hiai lohchinna leh hauhsaknate in a hon suse theizel uhi. Hiai bangte vualzawlna a hivek kei. Abraham vualzawlna hi dia sapna pen i etleh, vualzawlna a hong omdan haksa tak ahi.

MUHTHEIH VUALZAWLNA:
Pathian in Abraham a suante tan a luah ding gam a pia a, Sum-le-pai a hauhsakna a pia in; A lamzang sak a, melma lak ah a humbit in, nasemtu ding sikha leh huangvulh ganta a pia hi. A vualzawlte a vualzawl sak a, a hamsiatte leng a hamsiat zel a, Pathian in Abraham a pahtawi in a ompih den hi.

Kanan gam a tun in kial a hong kia a, Aigupta gam ah nek ding zawng in pai hi. Aigupta gam a tun in a zi ittak zuau gensak in a sanggamnu bang a, a kigensak ziak in Pharo’n a zi ding in a laksak hi. Pathian in Pharo leh a inkuante tung ah hipi khawktak a tunsak ziak in Pharo in Abraham zi Sara a pekikta hi. A zi ziak in Abraham a hong hausata a, huangvulh ganta, dangka leh dangka-engte leh sikha nasemtu ding tampi a hon nei hi. Himahleh a hauhsakna ziak in a hong buai a, Lota toh a omkhawm theita kei hi. Huangvulh ganta, Sum-le- paite pen vualzawlna chikhat himahleh a buaina pen a hita hi. Chi thupitak a bawl ding a sap himahleh ta a nei pah kei a, Sara lemgelna in Hagar lak ah tapa a hon nei a, Pathian thukhun a hong tangtun dek chiang in a bawinu leh a tapa muh masakpen tuh hawlkhiak a ngaizel hi. A buaihuai chitel mai maw?

Vualzawlna hi ding in a samtu deihna bang a kalsuan a ngai a, Pathian thu bang in Hagar leh Ishmael a hawlkhiak louh theihlouh ahi. Abraham in thuchiam ta Isak a neita, kipak mahmah dia lamet a hihlai in Pathian in Abraham kiang ah a tapa Isak pen halmang thillat a lan ding in a ngen zel hi (Gen.22:2). Abraham in a tapa neihsun halmang thillat a lan ding in a pai pihta, himahleh a tapa sik leh tang ading Belampa , halmang thillat a lat ding piak in om a; Abraham ginna ah Pathian a lungkim mahmah a vualzawlna tamtak a chiam nawn hi (Gen. 22:15ff). Pathian in a na chiamsa bang in Abraham pen nam thupi tak in a bawlta a, gou leh gam tamtak a pia hi. Pathian in a thuchiam sepsuah louh a nei kei a, muantham Pathian a hi. Abraham suan apan Jesu a hong piang a michih adia vualzawlna thupitak sihna apan a hinna a hong omta ahi. “Nang ah lei a namchih vualzawl in a om ding uh” chih a hong tangtungta hi. Mangthang leh lungkhamte, gentheihna thuakte suahtakna hong om in, natna chiteng a nate damsak in omta (Mat. 8:1-34; 9:1ff). Huaiziak in vualzawlna hi ding in muhtheih a vualzawlna i muh ban ah mihing sung lam a Pathian thilhihtheihna a kikhekna leh hoihna poimoh hi.

Gingtute pen Jesu Khrist in midangte adia vualzawlna hi dia hon sapte i hi (Mat. 10:8- 10; 28:18-20). Hiai mohpuakna semsuah ding in a hon samtu Jesu Khrist deihdan theihchet a poimoh. Jesu inleng, “Honsawlpa deihlam hih leh, a na sep zoh ding ka an ahi” (Johan 3:34) a chi hi. Hon samtu deihdan i theihchet a, a hon hotdamna ziak a hon sapna semsuahtu dia pan ding ahi.

KHALAM VUALZAWLNA:
Nang vualzawlna hi in chih i gen chiang a i kawksak tampen khalam vualzawlna ahi a, VUALZAWLNA PEN JESU KHRIST ahi. Ephesate 1:3 & 4 ah, “Aman vanmun khawng-a khalam vualzawlna chiteng in eite khrist ah hon vualzawlta, Amah maia siangthou leh dembeia om ding a leitung pianma a eite hon na teltak bang ngei in.” chi`n vualzawlna pen Jesu Khrist ahihdan hon hilh hi. Pathian in Abraham pen gamchiam lam a pai ding in sawl a, muhtheih gam Kanan tung mahleh mi gam a om bang in Isak, Jakob toh puan inn ah teng in, khopi suangphum nei Pathian gel leh lam a ngak nilouh hi (Heb 11:8-10, 13; Nas. 7:5). Mosi in “Khrist a muhsitna uh tuh Aigupta gam goute sang a thupizaw in a ngai a” (Heb 11:26) a chi hi. Abraham leh Mosi, ginna a phatthamte in vualzawlna diktak Jesu Khrist mah a thupipen uh hi`n ginna a Jesu Khrist a gam piak ding a gal et uhi (Heb 11:13; John 8:56). Muhtheih thilte kia vualzawlna hileh Abraham pai suansuan lou in mi panpih ding zong in a vakvak ding hi.

“Na suante ziak in khovel a namchih a navak ding uh,” (Nas. 3:25) a chi a, Taksa a suan leh pak kia hileh eite tanpha i navakna ding a omkei hi. Israelte leh Muslimte pen Abraham suan hi tuak mahle uh a kidou gige ua, namchih genlouh in amaute leng a navak kei uhi. Namchih navakna pen Jesu Khrist kia ah om hi (Nas. 3:26). Abraham kiang a thugentu in a gen Jesu Khrist toh kisai ahi. “Ginna a omte Abraham tate” (Gal.3:7-9) ahi a Abraham bang in vualzawl in om uhi (Eph 1:3,4). Tate i hihleh gouluahpihte i hi a, Jesu Khrist i neihleh khalam vualzawlna chiteng ei a ahi a, tangtawn hinna neitute i hi. Vualzawlna, Jesu Khrist na neita hia? Na inkuanpihte in a neita hia? Khovel in a neita hia? Vualzawlna toh kisai Siampute in a sam/gen chiang un, “TOUPAN nou hon vualzawl in hon veng zel hen: TOUPAN a mel na tung uah vaksak henla, hon hehpih zel hen: TOUPAN nou lam hong nga henla, lungmuanna nou hon pia hen,” (Num 6:24-26) chih ding ahi. Vualzawlna pen salam kia hilou in khalam thil leng ahihziak in Upate in “Pa Pathian hon itna, Jesu Khrist hehpihna, leh Kha Siangthou ompihna leh vualzawlna, na lak uah omta hen” chia sam tangpi uhi. Muhtheih thil a vualzawlna pen tangtawn daih ahi kei, hun tomchik sung a bei thei ahi. Himahleh Jesu Khrist ziak a i neih vualzawlna pen a bei ngeilou tangtawn ading ahi.

A tung a muhtheih leh khalam vualzawlna i tan theihna ding in Jesu Khrist, mikhialte hondam ding in hong si in thounawn hi. I Toupa Jesu Khrist sihna leh thohnawnna thupha, gammial a za nailou, kha mangthang lelte hinna thu hilh a, Jesu Khrist a hon neihsam chiang un, “Nang vualzawlna hi in” chih a tak a tungsaktu i hi ding hi. Muhtheih leh muhtheihlouh in eite`n vualzawlna i tang ua, Pathian phat in i om ua, himahleh i tung ah Pathian a kipak hia chih kivelchet a poimoh hi. “Biakin hoihtak i neih, budget muhzoh, phatna lasak leh thugen nuam ah Pathian a kipak mahmah” chih a hipah kei; Isai 53:10-ah, “A hinna khelhna adia thillat dia na zat peuhpeuh chiang in, a chi suan a muta ding a, a damsung nite a sausak ding, Toupa deihlam lah a khut ah lohching ina om ding” chih ahi.

Hinna neiloute`n vualzawlna, Jesu a neih chiang un Pathian a kipak hi. Pathian mission pen i mission, i naseppipen leh i hinsan hong hih chiang in nang vualzawlna hi in chih a lohching ding hi. I kipahna pen khamangthang mat, i na poimoh pen khovel tengteng a Tangthupha gen ahih chiang in theihpihtu hihna ah midangte adia vualzawlna na hithei ding hi. Amen.

© 2018 Evangelical Baptist Convention. All Rights Reserved. Designed By EBC